Ujöp da Oies
teater musical

Nosta valada á la fortüna da avëi n Sant che vëgn veneré te nüsc raiuns mo ince foradecá. Fora por döt l’ann odunse rovan adalerch jënt, che cun gran devoziun se mët tles mans de chësta gran porsona. Al pó ester che propi te nosta valada ne se rendunse nia cunt dla gran personalité che nosc Sant é.

Chësta é öna dles rajuns che á porté la Müjiga de Badia, adöm al Sorvisc ai Jogn Val Badia, a mët a jí n teater musical sön la vita de S.Ujöp da Oies. Ara se trata de n proiet de gran valur cultural, mo ince spiritual, che dess rapresenté la storia y porté dant i pinsiers dl Sant. La produziun é döta tles mans de porsones dla Ladinia. Autur dl toch é le professur Carlo Suani d’Al Plan, la musiga é gnüda scrita da Antonio Rossi da Ampëz, la regia é de Valentina Kastlunger d’Al Plan, la direziun musicala é tles mans de Fridl Pescoller de Badia y Bruno Rives da S. Martin de Tor.

Sön paladina sarál da odëi la Müjiga de Badia y 50-55 jobleri y ciantarins danter i 7 y i 70 agn de döta la Valada.

I orun presenté la vita dl miscionar Ujöp Freinademetz, a mët man da süa infanzia y so daciasa, Oies, jon inant tres i agn de stüde y de formaziun a Porsenú, cun le madorí dla vocaziun y la consacraziun a prou.

Dedô acompagnunse Ujöp te so iade che le condüj tla Cina y imparun da conësce sües emoziuns inchersciores, sü fistidi y sü pinsiers al contat cun na realté daldöt nöia y atramënter. I porvun da cherié sön paladina momënc de vita miscionara: na vita fata de oraziun, gran impëgn, dificoltés, soferënza y n amur sinzier por “so” popul cineje.